Gisilibrar sa kagamhanan sa dakbayan sa Sugbo ang Adlaw sa Mamumuo kon Labor Day niadtong Mayo 1, 2012 pinaagi sa usa ka misa sa Sto. Rosario Church alas singko sa buntag diin gisundan og Fun Run.
Ang Fun Run nagpanikad gikan sa Fuente Osmeña Circle kutob sa Abellana Cebu City Sports Center (CCSC) nga anaa na’y bag-ong track oval. Lakip sa misalmot sa maong okasyon ang Team Rama, mga pangulo sa tagsa-tagsang departamento ubos sa Office of the Mayor, Senior Citizens, mga miyembro sa civic, non-government organizations, ug mga empleyado sa City Hall.
Matud pa ni Cebu City Mayor Michael Rama, “I am thankful especially to the organizers that within a short notice, the event ended up being attended by a large number of participants. I also thank God that we joined in the city government and Team Rama and with everyone who participated for the celebration of Labor Day.”
Tinguha sa maong kalihokan ang pagpahulagway sa importansya sa mga mamumuhat sa tibuok nasud.
Miasoy si Rama nga, “Without labor, there would be no capital. Without capital, there would be no labor. We are here to complete the government with the people. All of us from the government are also employees, we are part of labor.”
Nasayran nga kintahay pormal nga paglusad sa Team Rama atol sa maong kalihokan apan dili kumpleto ang miyembro sa ma-ong bando niadtong higayona. Yellow ug green ang opisyal nga kolor diin anaa’y tatak Team Rama sa mga singlet sa mga misalmot sa nahisgutang fun run nga gi-apilan sa gatusan’g tigsuporta ug kawani sa City Hall.
Ang Team Rama gilangkuban nila’ng Rep. Pastor Alcover Jr. kauban sa iyang anak nga si Pastor Alcover II isip kapitan sa barangay Agsungot; Basak-Pardo barangay kapitan Dave Tumulak, San Nicolas barangay kapitan George Rama, konsehal sa Kasambagan nga si George Chang, konsehal Altea Lim sa barangay Pardo ug Lotlot Soon sa Inayawan, ug kanhi konsehal Edwin Jagmoc nga konsultant karon ni mayor Rama.
Mismo ang anak ni Mayor Rama nga si Atty. Mikel Rama mi-uban sa nahisgutang silibrasyon ug nagkanayon, “Kani ako’ng pagkuyog-kuyog, ako ning pagpakita sa pagsuporta sa akong amahan. Abli ra ko sa mga posibilidad. If tagaan ko og opportunity, it will also be an honor to serve the city.”
Gipahigayon sab sa Department of Manpower Development and Placement (DMDP) ang ika-25 nga Overseas Job Fair diin pormal sab gi-ablihan ni Mayor Rama human sa Fun Run atol sa silibrasyon sa Labor Day.
Butyag sa mayor nga isip sab nila’ng ipaabot sa katawhan ug ipahibaw nga anaa’y Team Rama.
