(PIO CEBU CITY) -

Nagmalampuson ang gipahigayon nga City Hall at Your Doorstep nga programa ni Cebu City Mayor Michael Rama didto sa Barangay Toong niadtong Hunyo 29, 2012.

Gipahimuslan sa gatosan ka mga lumulupyo sa maong barangay ang talagsaon nga higayon nga libreng serbisyo nga gitaga sa 22 ka mga departamento sa kagamhanan sa Dakbayan sa Sugbo. Gipahigayon ang maong kalihokan sa bakanteng luna kilid sa Toong Barangay Hall gumikan kay wala pa man ilang barangay sports complex.

Gisundan dayon sa sistematikong pagpahigayon sa libreng mga batakang pagpangalagad ang 'First Come, First Serve'. Ang maong kalihokan gipahigayon na matag Biyernes aron maserbisyoan ang 80 ka Barangay sa Syudad sa tibuok tuig.

Nagpasalamat usab si Brgy. Capt. Teotimo Bacalso kang Mayor Rama sa paspas nga pag-aprobar sa ilang mga gi-request nga mga proyekto sama sa sports complex, Tanod's quarters, senior citizen's building, ug road concreting.

"Nanghinaot og maningkamot ta nga sunod Pyesta sa Serbisyo adto na kini ipahigayon sa atong bag-ong gymnasium, atong gikinahanglan ang tiunay nga pagtinabangay alang sa kaayuhan sa tanan," dugang pa ni Kapitan Bacalso.