Traynta ka mga bata’ng Badjao nga napalgang kulang sa timbang ang gipakaon niadtong Hulyo 9, 2012 sa Badjao Side A, Alaska Mambaling, dakbayan sa Sugbu atol sa pagsugod sa ‘Supplemental Feeding for Badjao Children’ ning tuiga.
Gipasiugda kini sa Cebu City Commission for the Welfare and Protection of Children (CWPC) ug Department of Social Welfare and Services(DSWS) kauban sa National Commission on Indigenous Peoples (NCIP) diin gipahigayon ang maong programa sugod niadtong tuig 2006 ug mipadayon kada tuig.
Matud pa ni Alexis Aves sa CWPC, “Usa sa pamaagi sa pag-atiman kay ang paghatag og maayong nutrisyon sa atong mga bata karon.” Gisegurado sab sa kagamhanan sa siyudad sa Sugbu nga ang dugang nga pagkaon haog kini og sustansyadong kan-onon sama sa utanon.
Ang mga bata’ng Badjao nga anaay kalabot sa maong programa nag-edad og 2 - 4 ka tuig kinsa nagkinahanglan gayud og dugang nga pagpakaon gawas sa ilang inadlaw nga kan-onon. Ang maong pagpanghatag og supplemental food modagan sulod sa unom ka buwan o 120 ka adlaw.
Ipahigayon sab nga pagtimbang sa mga bata matag buwan aron tan-awon kun sila masakiton. Kun masayran nga adunay pagkunhod sa timbang o sakit ang bata, dayon siya’ng ipasusi sa health center sa barangay.
Segun ni Merlita Abejo isip usa sa mga City Nutrition Scholar, “Gawas sa pagkaon, edukaron sab ang mga mama. Tudluan usab sa saktong panghinaw ang mga bata kay useless ang ipakaon kon hugaw ang kamot.”
Awhag ni Abejo nga angay bansay-bansayon ang kanunay nga pagpanglimpyo aron mamintinar ang maayong panglawas ug himuong gawi ang pagsul-ob sa tsinelas mintras sila bata pa aron kini maandan.
Butyag ni Ryan Echevarria isip Protocol Officer ni Cebu City Mayor Michael Rama nga gihatagan gayud og dakong bili sa mayor ang kaayuhan sa Badjao community. Kauban sa DSWS, CWPC ug NCIP, gihatagan og igong pagtagad ang panginahanglan sa mga batang Badjao ilabi na bahin sa nutrisyon.
Mapasalamaton kaayo sa programa sila kapitan Rodolfo Y. Estella sa barangay Mambaling ug Pastor Alejandro Managbanag sa Church of Jesus Christ kinsa nagdumala sa simbahan diin nahimutang sab sa ubos nga puwesto ang Day Care center sa mga Badjao.
Misalmot sab sa paglusad sa tinuig nga supplemental feeding sila Violeta G. Rosal sa DSWS, Vivian A. Nardo isip district supervisor sa DSWS, Airal Daomani isip magtutudlo sa mga bata’ng Badjao, ug uban pang mga empleyado sa kagamhanan sa dakbayan sa Sugbu.
Gessa Marie T. Gunhuran
