Nagmalampuson ang ika 13 nga Bangga sa Kinaadman nga gipangulohan sa Cebu City Youth Development Commission kon CCYDC ilawom sa opisina ni Cebu City Mayor Michael Lopez Rama, nga gipahigayon didto sa Department of Education Conference Hall, New Imus Road ning Dakbayan niadtong Hulyo 27, 2012.

Naglangkob sa 11 ka tunghaan sa kolehiyo ug 38 sa highschool ang misalmot sa maong panagtigi sa kinaadman kon "Quiz Bowl". Ang matagtulunghaan adunay 3 ka mga tinun-an nga misalmot kini naglangkob sa 33 sa kolehiyo ug 114 sa Sekundarya. Sa maong indigay sa kaalam mipili ang mga hurado ug top 10 nga gipilian usab alang sa top 3.

Nasakmit ni Ain Khera Ycong sa University of the Philippines (UP) ang unang gantimpala sa Sekundarya, siya nakadawat ug tropiyo, certificate ug cash nga Php6,000.00. Gisundan kini ni Angelica Louise Alubin sa Cebu City National Science High School isip ikaduhang mananaog nga midala ug tropiyo, certificate ug cash nga Php4,000.00. Ang ikatulong pwesto nakuha usab sa taga UP nga si Jhelle Rabuya nga misakmit usab ug tropiyo, certificate ug cash nga Php3,000.00. Ang mga tinun-an sa sekundarya nga kategorya nagbangga sa ilang kinaadman kabahin sa mga topikong Current Events, History, English, Math ug Science.

Sa laing bahin, sa kolehiyo nga kategorya nakuha nilang Armand Henzkel Canoy sa Cebu Institute of Technology - University, Junmar Denila sa University of the Philippines, ug Jemiah Georgia Jabagat sa University of Cebu alang sa Una, ika-duha ug ika-tulo nga pwesto, nga misakmit usab ug tropiyo, certificate ug Php6,000.00, Php4,000.00 ug Php3,000.00 gikan sa una hangtod sa ikatulo nga mananaog.

Naglangkob sa mga hurado mao silang Dr. Erlinda F. Melgo gikan sa Dept of Education, Dr. Patricio G. Gabuya gikan sa Dept. of Interior and Local Government, ug Ms. Ariane S. Pada gikan sa Dept of Science and Technology.