Mikabat na sa kapin 18 milyones pesos ang nabayad sa CHAMP ngadto sa Cebu City Medical Center kon CCMC alang sa mga indigent nga pasyente niini.

Matod pa sa tigdumala sa CHAMP nga si Henry Sanchez, ang maong kantidad alang sa mga pasyente nga nagpatambal sa CCMC sukad adtong hinapos sa tuig 2011 hangtod 2012.

Ang CHAMP kon City Hospitalization and Medicines Program nagsugod niadtong Hulyo 1, 2010. Dako kining tabang alang sa mga lumulupyo sa dakbayan sa Sugbu, ilabina adtong mga kabos natong igsuon nga walay ikabayad sa ospital.

Adunay gigahin nga 35 mil pesos ang CHAMP nga gilangkuban sa 25 mil nga hospital expenses, 5 mil nga laboratory expenses ug 5 mil alang sa mga tambal sa matag-usa ka pasyente.

Ang mga gikinahanglan lang aron makapahimulos sa CHAMP mao ang Medical ug Voter’s Certificate, Barangay Clearance ug sa na-admit nga pasyente gikinahanglan nga magpakita og billing gikan sa ospital.

(Joan Marie E. Paquibot & Joleve Plarisan, USJ-R Masccom Interns)