Hugot nga gipahibaw ni Cebu City Mayor Michael L. Rama ang pagpadayon sa pagduso sa konseho sa budget alang sa drainage program human niubos sa dakong baha ang dakbayan kagahapong adlawa.

Mikabat ug 2.4 bilyones ang orihinal nga proposed budget alang sa drainage program sulod sa 5 ka tuig nga maglangkob ug 500 milyones matag tuig apan 100 milyones lamang ang giaprobahan sa konseho.

Ang kapin usa ka oras nga uwan niadtong Martes nakapatanggong sa mga commuters ug tungod niini ang mayor nipadayag nga mas labing gikinahanglan gayud ang pagpadayon niining programa ug angayng unahon ang kaayuhan sa katawhan.

Gani si Mayor Rama nipadayag nga labi siyang maapektuhan kung adunay mga katalagman nga muigo sa atong dapit sanglit siya man ang amahan sa siyudad.

“Mauwaw ko nga makakita ug kaigsuonan nato nga mutaak sa baha,” matud pa ni Rama. Asoy sa mayor nga ug pwede pa nga munaog siya sa sakyanan aron makita nila ang iyang pagsimpatiya kanila.