(PIO CEBU CITY) -

Dako’ng hagit ang gihatag sa mayor ngadto sa unom ka mga opisyales sa Microsoft Philippines kinsa mibisita sa buhatan ni Mayor Michael Rama sa City Hall kaganinang buntag.

Tuyo sa maong grupo ang pagpadangat nila kay Mayor Rama nga sila milusad sa ilang bag-ong produkto sama sa OS (Operating System) Windows 8, ug Windows Server 2012. Ipakita sab nila ang Microsoft Office 2013, ug Microsoft Surepoint dinhi mismo sa dakbayan sa Sugbo tibuok adlaw karon didto sa Sarrosa Hotel.

Matud pa ni Mayor Michael Rama nga ang teknolohiya karon gi-abusar sa katawhan ilabi na sa nagkadaiyang sitio ning dakbayan diin walay kinutobang pagtan-aw sa mga menor de edad sa dili angay nga mga hulagway, salida ug uban pa man gikan sa internet.

Nagkanayon usab ang mayor nga tutukan sa maong kompanya ang tinuod nga problema sa komunidad gamit ang ilang teknolohiya aron mahimo sila mismo nga abag sa kaugmaran sa dakbayan subay sa Public-Private Partnership nga programa niya.

Butyag sa mayor nga kanunayon ang pag-edukar sa katawhan sa matang sa teknolohiya kabahin sa hustong pamaagi niini aron malikayan ang iresponsableng paggamit sa internet.

Mipasalig usab si Bernadette Nacario isip Sales and Partner Director sa Microsoft Philippines kay Mayor Rama nga ang ilang bag-ong produkto motabang sa pag-ugmad sa kinatibuk-ang dakbayan ilabi na sa Sugbuanong komunidad.